M e s u d H a r a y

Mesud Haray-In Özel Websitesi

M e s u d H a r a y

Mesud Haray-In Özel Websitesi

آنا دیلیندن اوزاق قالان ملر - رضا براهنی


آنا دیلیندن اوزاق قالان ملر!

رضا براهنی



کؤرپه اوشاغین حیاتی‌، یاش یاریمینی دولدورانا قدر کورا chora دؤوره‌سی آدلانیر. بو زاماندا آنانین اوشاغینی آنا دیلینده دیندیرمه‌سی و دیله توتماسی اوشاق دونیاسی‌نین ان ایلکین اویونلاریندان ساییلیر.

اوشاق بو دؤنمده دیلین نه اولدوغونو باشا دوشمه‌سه ده، دیل، آنا ایله اوشاغین آراسیندا، سئوگیلیلرین توپ آتیپ-توتما(پینک پونک) اویونونا، عاطیفی (ائموسیونال) برابرلیگین آل-وئرینه چئوریلیر. بو کیمی عاطیفی آلیب-وئرمه‌نین، سونرالار، آیلار- ایللر و عؤمور- گون سووشدوقجا، اونودولماسینا باخمایاراق، بونلار گله‌جکده قورولان بوتون رابیطه‌لرین بینؤوره‌ داشی، تملی و قایناغی دیر.

آنا، دیلین آناسی‌دیر

آنا دیلی، دیللرین آناسی‌دیر

آنا دیلیندن اوزاق قالان ملر، گئجه گوندوز ملر، منیم کیمین ملر

آنا دیلی گئتمز، گئتسه ده دؤنر، قاپیدان سالسان ائشییه، پنجره‌دن گلر

آتا بو دؤورده اوچونجو آدامین خوصوصیتینده دیر. اوچونجو آدام شاهید حؤکمونده‌دیر. دیندیرمزهمده دیندیریلمز. آتادیر، حوضورو گؤزه گلمز، گؤزه گلمزسه ده حاضیر دیر. آنا ایله اوشاغین موناسیبتی ایکی من-ین بیربیرلریله، ایکی سن-ین بیربیریله موناسیبتی‌دیر. بئله‌جه من ایله سن موناسیبتینده، بیرجار اوشاق من،‌ آنجاق آنا سن اولور؛ ائله وخت ده وارکی، آنا من اولور و اوشاق سن اولور. هله دوغولمامیش دیلین رولو بو موناسیبتده، ایکی وورغونون و ایکی سئوگیلی‌نین سئوگی دیلینی اویناماغیدیر. سئوگی اویونوبئله‌اولور. آنا، اوشاغین وارلیغیندا دوغرولور، اوشاغی دوغرولدور، اونونلا دوغرولور. آنا باشدان- آیاغا اوشاغ ایله منیمسه‌له‌نیر.

سونرا بیرزادا نیشان قویما دؤوره‌سی باشلاییر. شئیلره نیشان قویولور. باخیشا، الین ترپنمه‌سینه، دوداقلارا، اوزدن و یاناقلاردان سئزیلن گولومسونمه‌لره! آتا داها ایچری گلیر. اوشاغین اوزو اوچونجو شخصی ضمیره، دئمک «او»-نا ساری دؤنور. گئت-گئده نیشانه‌لر دونیاسی، آنا ایله اوشاغین برابرلیگی اویونلارینین یئرینی توتور. آتا اوچونجو آدام کیمی اورتایا چیخیر. اؤزونو، جینسیتینی یاداکی جینسینی اوزه چکیر: اوشاق باشقانی، او بیریسینی گؤرمگه نایل اولور. آنا دیلی دونیانی قاپساماغا دوغرو بویلانیر. اشیانین و سسلرین اؤزونده عکس ائتدیر‌ن آری- دورو گوزگوسونه یادا، کاس و بولانلیق آیناسینا چئوریلیر.

دیلی دوغوران، بیر یاندان اوشاق ایله آنانین من ایله سن ایلگیسی ؛ اوبیری یاندان اوشاق ایله آتانین و دونیانین من ایله اوموناسیبتی دیر. او گوزل، شن و حتا شهوانی اویون، اوشاق و آنانین موناسبتی اساسیندا قورولور. سونراکی مرحله‌ده ایشاره‌لر(سیمبوللار) دونیاسیندان معنالارا گئچمگه باشلاییر، معنالار دونیاسیندان ایشاره‌لره (سیمبوللارا) دوغرو یولادوشمگه باشلاییر. شاعیر دئدیگین کیمسه، آنا ایله اوشاغین او ایلکین اویونونو اؤتوشن ایللرین آرخاسیندا اونودارکن، سونرالار اویونون یادینا دوشور، گؤزل شعر قوشارکن، کلیمه‌لردؤزمه‌سی‌نین باشدان باشا دادلی اویونونو ایشینده اساس گؤتورور. دئمک دونیانی تانیماغا گؤره، او ایلکین اویوندان ایشاره‌لره، معنالارا، قورولوشلارا و قورولوش پوزمالارا دوغرو قاییدیر، آنجاق سونرا، ائله ‌بیل نه‌ ایسه یادینا دوشور کی، گئری دؤنمه‌لی اولدوقدا، اوشاقلیقدا اوینادیغی اویونو داها اوشاق اولمادیغی بیر دؤورده یئنیدن اوینامالیدیر. بئله اولاندا، نه حادیثه باش وئره بیلیر؟ قاباقکی لذتین یئرینی آیری بیر لذت توتور.

نیظامی‌نین یئددی گؤزل-ینده‌کی بیرینجی گئجه‌ یادینیزدادیرمی؟ بیرقادین، هامیلیقجا آداملاری قارا گئینمیش بیر شهرین ناغیلینی سؤیله‌ییر. پادشاه قارا گئییمه چولقانمانین سرینین آچیلماسینی ایسته‌ییر. بیر نفر قصابا قوناق ایکن ، قصاب اونو گئجه ایلن بیر سبده قویور و سبد ایله یوخاری چکیلیر، یوخاریدان باخاندا گوزل بیر باغدا اوینایان گوزل قادینلار گؤرور. اونلارین ایچینده بولونان ان گؤزل قادینا وورولور و قادیندان اونون ویصالینا چاتماغینی ایسته‌ییر. قادین گئجه‌ده اونو اؤزونون کنیزلرینین بیریسی‌نین یانینا گؤندریر، آنجاق نئچه گئجه گئچندن سونرا کیشی‌نین صبیری دؤزومی

کسیلیر و قادیندان یالنیز اؤزونون ویصالینه یئتیشمگی ایسته‌ییر. قادین دئییر، گؤزلرینی یوموب منی اؤپ. کیشی اونون سؤزونه باخیر، آنجاق گؤزلرینی آچاندا اؤزونو سبد ایچینده آشاغی دوشمکده و او گوزل جنتدن اوزاقلاشماقدا گؤرور. بئله‌لیکله اودا قاتیلیر قادینین آغیسینی چکنلره و قارا گئییمه بورونور. قادینین یئددی گؤزلده‌کی آدینی بیلیرسینیزمی نه‌ایمیش؟ تورکناز یاداکی تورکتازایمیش.

بیزیم هامیمیزین ایتیردیگیمیز گوزل قادینین یئرینه بئله گوزل بیر ناغیل اوتورور. بیزلر او آنامیزدان، او تورکنازدان یاداکی تورکتازدان، آنامیزین دیلیندن اوزاق دوشموشوک.

آنا دیلیندن اوزاق قالان ملر، گئجه گوندوز ملر

منیم کیمی بو قارانلیقدا ملر.

تورکجه‌یه چئویرنی: سئودالی

نظرات 0 + ارسال نظر
برای نمایش آواتار خود در این وبلاگ در سایت Gravatar.com ثبت نام کنید. (راهنما)
ایمیل شما بعد از ثبت نمایش داده نخواهد شد