M e s u d H a r a y

Mesud Haray-In Özel Websitesi

M e s u d H a r a y

Mesud Haray-In Özel Websitesi

18 تموز آخشامجلیغیندا

 

گولـله له ندیرجکلر ایکیمیزیده

18 تموز آخشامجلیغیندا بیردن

الینی یاراما باس

       قان آپارماسین

    الیمی گوزونه توتورام

گوزونون اونو قارالماسین!

سنه گلیرم وطن

 

داها بویوکلوکلره شعیر لنمه یه جه یم

  قاف داغینا چیخماغیما  دا...

      ان کیچیک،

       اینجه بارماغیمی توتوب سنه ساری

      گوسترگه بارماغیمیدا سنه ساری توتورام

           سنه گلیرم وطن.

اسماعیل کریم زاده نین خاطیرلاماسی

 

 

بیر ایکی ده نه جیغارا جیبینده

   چاخماقسیز دولاناردی هر یئری

        ایی بیلمز بورنونون اوجودا

                   قیزاراردی سویوقدان

دیک – دیک دانیشیب

یاناکی باخاردی یاشیل گوزلری

       شعیرلننده اوریی

"ناظیم "ی اوخویاردی "حکمت" دن یاخشی

"یا قاراباغ"دئییردی "اوزان عاریف" دن بتر

قالادا قالیر هله سسی

قایادا دینله نیر اونون نفسی

تام ایی

   ایگید

گنج یاشیندا آغلایاردی قوجامان کیمی

  یالتاقلارا توخوشادی سیلدیرم تک

                   شیمشک  سایاق

شعیر باجاریقینداییز ایکیمیزده

 

شعیر باجاریقینداییز

ایکیمیزده

سن و او

باجاریقلی ییز ایکیمیزده

من و او

دنیز لپه لرین آشا سالاجاییز

سن و من

بو آشی ایچن اوله جک

یاشایاجاییز ایکیمیزده

...

قالمیاجاییز بئله

 

سنین اللرینین بارماقجیکلاریندا

      حنالاناجاق اومودلاریمیز

دور بو قیریق ایپ حیاتمیزی دوگونله!

بو قالماقالدا قالمیاجاییز بئله

                          سنینله

تاکسی

 

تلم تله سیک آتدیملایاجاییز

     گله جه ییز

دونوب گئریه باخمایا-باخمایا

تاکسییا...

مینمه یه جییز

آخی !

پارامیز توکنمیشدی دونندن

53

 

53

یوزده نه 13

بو چیلغین کوچه لرین باغیرساقلاری

دولانیب اللریمیزه

قادین!

دوغوزدوراجاقلاریمیزین آرزیسین

               آرزیلایاجاقدی می؟

دوغوزدورورام دوغروسوندان اوزومو

گلسن غم ائویم یار یئنه ویران اولاجاقدیر

 

گلسن غم ائویم یار یئنه ویران اولاجاقدیر.

درد چکمیش اوره ییم سنه حیران اولاجاقدیر.

 

بولبول بو بوجاقلاردا اولوبدور غمه یولداش

گلسن بو بوجاقلار یئنی گولشان اولاجاقدیر.

 

عالم دیلی خاموش اولاجاق سن گوروننده

دیللرده جمالین یئنی دستان اولاجاقدیر.

 

وارلیقدان آییردین منی ای زولفو پریشان

چکسنده کمنده سنه قوربان اولاجاقدیر

 

"مسعود" نه دئییرسن یئنه سینمیش اوره ییندن

هر کیم قانا بیلسه اوره یی قان اولاجاقدیر.

 

 

20/3/1375

گوزه ل یار

چوخ آختاردیم ائللر ایچره گورمه دیم

سنین کیمی بیر مه لیقا گوزه ل یار.

عومرومده چوخ جور و جفا چکمیشم

گل دردیمه ائیله چارا گوزه ل یار.

 

عشقین یولو چوخ داشلی دیر بیلیرم

وورغون اولان گوز یاشلی دیر بیلیرم

اجل حوکمو یوز باشلی دیر بیلیرم

آخیر چکر منی دارا گوزه ل یار.

 

عومور بویو حسرت ایله قالمیشام

عشق الیله اورک درده سالمیشام

نه لر گلسه من بوینوما آلمیشام

کونول پوزغون اورک یارا گوزه ل یار.

 

 سن ایسته مه منیم عومروم دارالسین

پاییز اولسون گول بوداغیم سارالسین

نه قورخوم وار،گونوم گوندن قارالسین

وورغونونام گوزو قارا گوزه ل یار.

 

پاییزدادا سئوگی گولو سارلماز

محبت داغلارین قیشدا قار آلماز

"مسعود" دئیه ر وورغون اولان قوجالماز

دئیسه اونا مینلر یارا گوزه ل یار.

 

 

12/04/1376

بولبولوم اینله مه چوخ

 

 

بولبولوم اینله مه چوخ نوگول خندان گله جک

بو دایانماز اوره یین سئودییی جانان گله جک.

 

یعقوبون قلبی یئنه آغلاییر هیجران گونودور

دئی اونا اوزله دییین یوسوف کنعان گله جک.

 

صبریم آخیر توکه نیب ائیله مه چیلداق طبیبیم

دوزوموم یوخدو عذابه، بوراخ ایمان گله جک.

 

ایوبون صبرینه باخ اودلاییب هیجران اوباسین

عیسی دک هر نفسیندن دیریلیب جان گله جک.

 

دئمه "مسعود" قالاجاقدیر بئله دونیادا کده ر

سیندیران قلبینی بیلسین اونا تاوان گله جک.

 

گله جک بیر داها وورغونلارا سئوگی قوناغی

سیندیرین باده غم جامینی جانان گله جک.

 

27/2/1375

تناقض

 

اولمه سمده قدردن، بو درد منی اولدورور

آیری دوشدوم من یاردان، هله کی اینانمیرام.

ائللر دئییر یار گئتدی، یئنه سن یالقیز اولدون

بو سوزلری ائشیتیب، دوشونوب، قانانمیرام.

 

دونیا بویو آغلارام، دنیز کیمی طوفانلی

مین ایل سورسه قالارام، یئنه عشقه نیشانلی

نیگاریم گاسه گورسه، اوره یی اودلو قانلی

یاتار دورماز بو درده، دئییر کی اویانمیرام.

 

گئدر اولدو نیگاریم ادل ایچیندن غوربته

هئچ بیلمه دی دیغلارام، دوزه بیلمم حسرته

او اولدو ایتگین، سورگون، چاتمادی سعادته

خوشبخت اولسایدی باری، دئییردیم کی یانمیرام.

 

سولغون کونول قوی یانسین، ایلقاریما اینانسین

بو قارا باسما ایله، قوی یوخودان اویانسین

بیلسین بئله دیر دونیا، بئله لیکه یارانسین

یانان عشقین اودونا دئییر کی یوخ! یانمیرام.

 

"مسعود" دئییر یار عشقی، بالدیر من اونا آری

دونیا لذتلریله  سئوگیدیر یاری – یاری

سئوگی پیلله لریله یوکسه لرسن یوخاری

بو عشقین اول سوزو، دئییه سن، اوسانمیرام.

 

 

02/04/1376

 

اولار آیا ؟

اولار آیا من ایچین دیلبر و دیلدلر اولاسان؟

اوره ییم غمخانادیر سن ا.نا غمخوار اولاسان؟

 

یئنه دیلدلرا دئدیم گل بو اوره کدیر سن ایچین

دائمن تاب و تب ائیلیر سن اونا یار اولاسان.

 

یارپاغیم سولدو خزان تاپدالاییب وار یوخومو

دئمیرم بیرده گلیب ده سن اونا بار اولاسان.

 

یانارام شام کیمی صبحه کیمی جان وئره رم

بو یانار عشقه دئییر یاتمیشا بیدار اولاسان.

 

آغیل اوغروندا چالیشدیم کی اولام عاقل شهر

عشقه هوشیار دئدی: آغیلینان اغیار اولاسان.

 

اولاسان عاشیق و دیوانه جانان گره یی

هامی میلت دئیینه ازدمی بیزار اولاسان.

 

مین ایلی آغیل اونوتسان یئنه "مسعود" آز اولار

او برابردی همین عشقیده سن زار اولاسان.

 

 

09/12/1376

 

یاتمامیشام، اویاغام

 

یاتمامیشام، اویاغام، آی آنا جان، آنا جان.

اولوسوما دایاغام، آی آنا جان، آنا جان.

 

همت منیم شعاریم، وارلیغیما حیمایت

دونیا بویو وار حسرت، قورتولماسا حماقت

واختی سو باشدان آشدی، تاثیرسیزدیر شیکایت

 

بو درده من اولوره م، آی آنا جان، آنا جان.

تقدیریمی بیلیره م، آی آنا جان، آنا جان.

 

بو دردلری بیله نه گره کیر کی آییدا.

ایری یولو گئده رسه گره ک کی تئز قاییدا.

غالیب گله ریک سونوندا آز اولساقدا ساییدا.

 

بو سوزلری دئیه رم، آی آنا جان، آنا جان.

قیزیل کوینک گییه رم، آی آنا جان، آنا جان.

 

چوخ دونیادا گزرلر، اوزلرینی بزرلر

حاق سوزونو دئیه نی قاداقلاییب ازرلر

هامی گلیب گئده جک، چولده یئل دک گزرلر.

 

یاخشی یامان قالاجاق، آی آنا جان، آنا جان.

"مسعود" حاقین آلاجاق، آی آنا جان، آنا جان.

 

 

2/4/1376

هر گئجه شمع اودونا دولت پروانه یانار

 

هر گئجه شمع اودونا دولت پروانه یانار

عشق زوققومون ایچین عاریف فرزانه یانار

 

دئدیم: ای حور ارم باغی و جنت سنه دیر

دئدی: خلیفه کیسه سیندندی باغیشلا نه یانار؟

 

دئدیم: ای بوت نه اولار من قول اولام درگاهینا

دئدی: سوس کوفر دئمه، افسونا بوتخانه یانار.

 

دئدی: ای وای منه اولماسا بیر جام شراب

اوجا سسله دئدی کی: ایستمه پیمانه یانار.

 

دئدیم: ای سرو گوزه ل قامتینین قوربانیام

دئدی: آیدیندی ائله اولمه لی قوربانه یانار.

 

دئدیم: آخیر سنین عشقیده یانان "مسعود" اولوب

دئدی: مسعود اولا یا اولمویا، بیر آنه یانار.

 

 

21/01/1367

بو ایل

 

 

بو ایل

 اوره ییمین اکینه جک یئرلرینده

        بوغدا یئرینه

        بومبا اکه جه یم.

آل قانیملا

      بومبالاری سوواراجایام.

گوزلریمده دالغالانان نیفرت سیسیله

         قودوزلاری بوغاجایام.

قان فیشقیراجاق گوزلریمدن

باشدان دیرناغا بومبا لاناجایام.

آتم - آتم

 

هر شئی

      آیریلیر بیر بیریندن.

آتم - آتم

        سنده، سندن

آیریلیرسان مندن.

منسیزلیکلرین فرقینده اولما سنده

 

نه وارلیق

  نه یوخلوق

نه سنلیک

      نه سنسیزلیک

فرقینده اولمادیغیمدیر

اولورسا

وار اولدوغوندا

   منسیزلیکلرین فرقینده اولما سنده.

یئنه ده نیفرت

 

یئنه ده نیفرت

    واراجاق اوره ییمه

کوکسومون فیلته سینی اودلاسام بئله

        پارتلایاجاق بیردن

                                 اورییمدکیلر اوزونوزه

BURADA

 

 

Burada çörəyin ustunə

              Qan damib.

Yiyəsən,

      Yemiyəsən

           Öləcəksən.

Burada ölməsən,

       Yaşaya bilməyəcəksən.

 

FISILDAŞAQ

 

 

Gülümsəmək,

             Olub yasaq!

                Dodaq – dodağa

                           Fisildaşaq.

 

ÖZGÜRLÜK

 

 

 

Mən arzılar yelkəniyəm

          Dəniz bağrinda, dalğalar qucağinda

                                 Laylayaram.

Qocaman dağlarin daşiyam

             Başıma qar yagmasa,

 

 

                             Köksümdə BOZQURD ulamasa,

                                                Boğularam.

Mən arzılar yelkəniyəm

                         Özgürlüyə sarı yel əsməsədə,

                              Dalğalar susasada,

                                BOZQURDlar ulamasada

                           Özüm ulayib,

                                    Dəlilər kimi,                

                   Dənizə batacayam.

                     Özgürlüyə çatacayam.

QAÇQIN

 

 

 

  Sən!

        Səs səmirsiz ayaq götür

           Eşitməsinlər bizi birdən

             Qaçqın taliyimizdi

                        Qaçırıq özümüzdən.

 

QURBƏT

 

 

Qurbət diyə hıçqırıqdım,

             Bir musluq kimi damlatdın,

                                              Dəldin ürəyimi.

Gözlərim səni

         Damladı qara topraga

Xiyavanlar uzanışdı

              Hünkürükdüm,

                   Kırıxdım özümü.

Arabalar fışqadı.

     Bəkçilər hoyladı.

         Sümsük itlər hapıldadı,

                             Məni görəndə sənsiz.

Uvand olmadi əynimə köynəyim.

Yabanci diyə öz məmləkətimdə,

                  Üşüdüm istidən,

                      Yandim sazaqdan.

Mənə bir gözgü gətirin,

                     Sevgilimi görmək istəyirəm özümdə.