X
تبلیغات
زولا

M e s u d H a r a y

پادشاهلا پینه چی - ناغیل


پادشاهلا پینه چی 


بیر پادشاه اوز وزیرینی ئوز یرینه قویوب ، او بیری وزیری ایله تغییر لباس اولوب ئولکه نی گزمگه چیخیر . ایکیسی ده درویش پالتاری گئیینیرلر که اونلاری تانییان اولماسین .
شاه وزیری ایله آز گدیر چوخ گئدییر یولدا بیر کیشیه راست گلیر. کیشی ایله سلاملاشیب باشلاییرلر گئتمگه ، گورور که کیشی ده اونلارلا گئدیر . اودور که دئییر:
- کیشی ایندی که ، بیر یئرده گئدیریک گل یولا نردبان سالاق .
کیشی دئییر:
- درویش بابا ، بو یکه لیده یولا دا نردبان سالماق اولارمی ؟
شاه کورور که ، کیشی اونون سوزینی باشا دوشمه دی . داها اوستونی وورمور . بونلار گئدیب بیر شهره چاتیرلار . کیشی دئییر :
- درویش بابا بورا بیزیم شهریمیزدیر . ایندی من گئدیرم ائویمیزه .
شاه دئییر :
قارداش بیزی بیر گئجه لیکه آللاه قوناغی ساخلارسانمی ؟ کیشی مسجدی گوستریر که ، آللاه قوناغی اورا گئدیر .
کیشی اونلاردان آیریلیب گلیر ائوینه . یولداکی احوالاتی قیزینا سویله ییر .
قیز دئییر :
- آتا گئت او درویشلری قوناق گتیر . اونلار عقللی آداما اوخشاییرلار .
کیشی دئییر :
سن که اونلاری گورمه ییبسن . نه بیلیرسن که . عقللی آداما اوخشاییرلار ؟
قیز دئییر :
اونلار سنه دئیینده گل بو یولا نردبان سالاق . دئمک ایسته ییرمیش که گل یولی صحبت ائده - ائده گئدک . سن اونون سوزونی باشا دوشمه ییبسن .
قیز نه قدر ائله ییر آتاسی اونلاری ائوینه چاغیرماق ایسته میر . اودور که قیز دئیر :
- آتا غریب آدامدیلار . هیچ اولماسا بیر آز خورک حاضرلاییم آپار وئر یئسینلر.
قیز بیر تهر آتاسینی راضی سالیر . بیر بوشقاب دولما . بوتوو تندیر چورگی . بیر قاب دا سود وئریر که ، آپار وئر . قوناقلارا منیم آدیمدان دئیه رسن که . قیزیم دئییر آی بوتوودیر. اولدوزلار چوخدور . سایا بیلمدیم . دریادا آغزیناجان دولودور . سونرا انولار نه دئسه لر گلیب منه دئیه رسن .
کیشی خورگی آپاراندا یولدا آچیب دولما ایله چورگین یاری سینی یه ییر . سودی ده تمام ایچیر . قاب بوش قالیر . سونرا خورگین قالانینی آپاریب درویشلره وئریر . درویش گورور که بشقابین ایچینده اون – اون بش دولما وار . پارا چورک ، بیر ده بیر بوش قاب . درویشلر دولما ایله چورگی یه ییرلر قابلاری کیشییه قایتاراندا ، درویش دئییر :
گئت قیزینا دی که ، آی پارا ایدی ،اولدوز دار چوخ دکیلدی ، اون – اون بش اولاردی ، دریادا تمام قوروموشدی .
کیشی گلیب همین سوزلری قیزینا دئین کیمی قیز دئدی :
آتا ، عیب دکیلمی سن نیه قوناغا آپاردیقین خورکی یه ییبسن ، سودی ده ایچیبسن .
کیشی دئییر :
قیزیم دولمانی یولدا یه دیکیمی سن هاردان بیلدین ؟
قیز دئییر :
بونی درویشلر سنین دیلین له منه خبر وئردیلر . من سنه دئیه نده که ، آی بوتوودیر ، اولدوزلار چوخدور ، دریا دولودور ، دئمک ایسته ییردیم که ، چورک بوتودور ، دولمالار چوخدور ، سود ده قابلا بیردی . درویشلر منه خبر گوندردیلر که ، آی پارادیر ، اولدوزلار چوخ دکیل ، دریا قورویوب ؛ یعنی چورگین یاریسینی ، دولمانین چوخونی یه ییبلر ، سودو ده تمام ایچیبلر .
قیز آتاسینا چوخ یالواردی که ، او درویشلری هیچ اولماسا بیر گونلوکه ائویمیزه قوناق گتیر . کیشی چار - ناچار گئدیب درویشلری ائوینه گتیردی .
کیشی نین قیزی نین گوزی بالاجا چپ ایدی اودور که ، ائو شئیلرینی دوزنده بیر آز اکری قویموشدی . درویشلر ایچری گیرن کیمی ائوه دقتلی باخدیلار خوش گلدیندن سوراائو صاحبی دئدی :
درویش قارداشلار ائویمیز نئجه دیر ؟ خوشونوزا گلیرمی ؟
درویش قیزین گوزونون چپ لیکینه اشاره وورماق اوچون دئدی :
ائوینیز چوخ قشنگدیر ، اما بیرجه عیبی وار . باجاسی بیر بالاجا اگلیدیر .
تئز قیز جواب وئردی که باجانین اگری اولماغینا باخما ، توستی دوز چیخیر .
درویشلر بیر آز اوتوراندان سونرا قیز اونلاردان خبر آلدی که ، اوره کی نیز نه ایسته ییرسه یئمکه حاضرلاییم . شاه گوردی که کیشی نین حیطینده بیر آت ، خیلی تویوقلاری وار ، اودور که ، دئدی:
بیر ائله شئ گئتیر که ایچینی ئوزوموز یه یک ، اورتا – سینی تویوقلارینیز ، قیراغی نی دا آتینیز .
قیز او ساعت گتیریب اورتالیغا بیر یئمیش قویوب دئدی :
ایچینی ئوزونوز یه یین ، توملارینی تویوقلارا وئرین ، قابیغی نی دا آتیمیز یه یر .
پادشاه قیزین عقلینه تعجب ائله ییب دئدی ، آفرین دئدی .
شاهلا وزیر قیزدان چوخ راضی لیق ائله ییب قایتدیلار . یولدا قاباقلارینا بیر پینه چی چیخدی . شاه ائشیتمیشدی که بو پینه چی ده چوخ عقیللی کیشیدیر اودور که اونون یانینا چاتاندا شاه الینی باشینا قویدی پینه چی جواب اولاراق الینی دیلینه ووردی.
سونرا شاه دئدی:
ینه چی قارداش دوققوزی اوچه وورا بیلیب سنمی ؟
پینه چی دئدی :
ووردوم توتمادی هم ده ایکی لر قویمادی
شاه دئدی :
اوزاقداسان یوخوندا ؟
پینه چی دئدی :
اوزاغی یاخین ائله میشم.
شاه ینه سوروشدی که ایکیده سن اوچده ؟
پینه چی جواب وئردی که : ایکی نی اوچ ائله میشم. شاه آخردا دئدی :
قاز گوندرسم یولا بیلرسنمی ؟
پینه چی دئدی :
ائله یولارام .
شاهلا وزیر پینه چیدن آیریلیب گلدیلر. شاه پالتارینی دگیشیب تخته چیخاندان سونرا دئدی :
وزیر سنین اوچون عیب دیر که ، پینه چی نین یولدا دانیشدیغی سوزلرین معناسینی بیلمیه سن . اودور که گئت اویرن . اما مبادا کیشی نی اینجیده سن .
وزیر چوخلی پولدان قیزیلدان گوتوروب آتینی مینیب قاییتدی پینه چی نین یانینا . کیشی نی تاپیب دئدی :
شاهلا دانیشدیغین سوزلرین معناسینی منه دئیه رسنمی ؟
پینه چی دئدی :
سوزون هره سینه بیر قیزیل وئرسن دئیه رم.
وضیر راضی لاشدی .
پینه چی دئدی :
شاه الینی باشینا قویماقدا سوروشوردی که ، باشین سلامت اولماق اوچون نه ائتمک لازمدیر .من الیمی دیلیمه ووردوم که دیلینی ساکت قویسان ، باشین سلامت اولار .
سونرا او دئدی :
دوققوز اوچه ووردونمی . یعنی یازی ، یایی ، پائیزی – دوققوز آیی ایشله ییب اوچ آی قیشیدا دولانماق اوچون روزی توپالایا بیلیبسنمی ؟
دئدیم :
ایشله دیم بیر شی چیخمادی . هم ده اوتوز ایکی دیشیمدن آرتمادی . سونرا شاه دئدی :
اوزاقداسان ، یاخیندا ؟ اوزاغی گورورسن یوخسا یاخینی ؟ من جواب وئردیم که ، یاخینی گورورم .ایکیده سن اوچده . یعنی آیاقلارین سوزونه باخیرمی . دئدیم که ایکی نی اوچ ائله میشم. یعنی ایکی آیاغیملا یریمه گه چتین لیک چکیرم . الیمه آغاج دا آلمیشام . آخردا شاه دئدی : قاز گوندرسم یولارسانمی ؟ دئدیم که یولارام . او قاز دا سن ایدین . پوللارینی الیندن آلدیم .
وزیر پینه چی یه چوخلی قیزیل وئردیگیندن پشیمان اولدی . آتی سوروب گئتمک ایسته ینده فکر لشدی که ، قوی منده اونا سئوال سوروشوم ، جواب وئره بیلمسه ، دببه له ییم پوللاریمی آلیم .
وزیر دئدی :
آ کیشی ایندی سن ده دی گوروم بو ساعت پادشاه نه ائله ییر ؟
پینه چی بیر آلتدان یوخاری باخیب دئدی :
سن بیلیرسن که ، پادشاه بویوک آدامدی ، پادشاه حققینده دانیشاندا گرک بیر آز حرمتلی اولاق . ایندی من اوتورموشام قورو یرده ، قاباقیمدا دا جیریق – جیندیر آیاق قابی لار ( باشماقلار ) . بوردان شاهین حققینده دانیشماق اولار ؟ گل سن آتی وئر منه ، او زرلی عبانی دا سال چیگنیمه ، قامچینی ده وئر الیمه سونرا دئییم .
وزیر راضی اولدی . آتدان دوشدی . او ساعت پینه چی سیچراییب میندی آتا ، وزیرین زرلی عباسین چیگنینه سالیب دئدی :
وزیر بیل اگاه اول ، بو ساعت پادشاه سنین کیمی آتلی لاری ائله ییر پیاده ، منیم کیمی پیاده لری ائله ییر آتلی . دی خداحافظ !!
پینه چی آتا بیر قامچی ووروب گوزدن ایتدی . وزیر ها گوزله دی پینه چی گلیب چیخمادی . آخردا سویو سوزله – سوزله گلدی پادشاهین یانینا .
پادشاه دئدی :
وزیر گورورسنمی دنیادا نئجه آداملار وار ؟ ایندی دی گوروم ، وزیرلیکه او لاییقدیر ، یوخسا سن ؟
وزیر پینه چینین اوندان عقیللی اولدوغونی بوینونا آلدی .
شاه پینه چی نی تاپیب اونو وزیر تعیین ائله دی .

گویدن اوچ آلما دوشدی . بیری منیم ، بیری سنین ، بیری ده ناغیلا قولاق آسانلارین .



تایپ ُ تهیه ُ و منبع : www.modarres1.blogfa.com

Share
text-align: center; BlogSky:Logo ImageSrc //a