گلسن غم ائویم یار یئنه ویران اولاجاقدیر.
درد چکمیش اوره ییم سنه حیران اولاجاقدیر.
بولبول بو بوجاقلاردا اولوبدور غمه یولداش
گلسن بو بوجاقلار یئنی گولشان اولاجاقدیر.
عالم دیلی خاموش اولاجاق سن گوروننده
دیللرده جمالین یئنی دستان اولاجاقدیر.
وارلیقدان آییردین منی ای زولفو پریشان
چکسنده کمنده سنه قوربان اولاجاقدیر
"مسعود" نه دئییرسن یئنه سینمیش اوره ییندن
هر کیم قانا بیلسه اوره یی قان اولاجاقدیر.
20/3/1375
چوخ آختاردیم ائللر ایچره گورمه دیم
سنین کیمی بیر مه لیقا گوزه ل یار.
عومرومده چوخ جور و جفا چکمیشم
گل دردیمه ائیله چارا گوزه ل یار.
عشقین یولو چوخ داشلی دیر بیلیرم
وورغون اولان گوز یاشلی دیر بیلیرم
اجل حوکمو یوز باشلی دیر بیلیرم
آخیر چکر منی دارا گوزه ل یار.
عومور بویو حسرت ایله قالمیشام
عشق الیله اورک درده سالمیشام
نه لر گلسه من بوینوما آلمیشام
کونول پوزغون اورک یارا گوزه ل یار.
سن ایسته مه منیم عومروم دارالسین
پاییز اولسون گول بوداغیم سارالسین
نه قورخوم وار،گونوم گوندن قارالسین
وورغونونام گوزو قارا گوزه ل یار.
پاییزدادا سئوگی گولو سارلماز
محبت داغلارین قیشدا قار آلماز
"مسعود" دئیه ر وورغون اولان قوجالماز
دئیسه اونا مینلر یارا گوزه ل یار.
12/04/1376
بولبولوم اینله مه چوخ نوگول خندان گله جک
بو دایانماز اوره یین سئودییی جانان گله جک.
یعقوبون قلبی یئنه آغلاییر هیجران گونودور
دئی اونا اوزله دییین یوسوف کنعان گله جک.
صبریم آخیر توکه نیب ائیله مه چیلداق طبیبیم
دوزوموم یوخدو عذابه، بوراخ ایمان گله جک.
ایوبون صبرینه باخ اودلاییب هیجران اوباسین
عیسی دک هر نفسیندن دیریلیب جان گله جک.
دئمه "مسعود" قالاجاقدیر بئله دونیادا کده ر
سیندیران قلبینی بیلسین اونا تاوان گله جک.
گله جک بیر داها وورغونلارا سئوگی قوناغی
سیندیرین باده غم جامینی جانان گله جک.
27/2/1375
اولمه سمده قدردن، بو درد منی اولدورور
آیری دوشدوم من یاردان، هله کی اینانمیرام.
ائللر دئییر یار گئتدی، یئنه سن یالقیز اولدون
بو سوزلری ائشیتیب، دوشونوب، قانانمیرام.
دونیا بویو آغلارام، دنیز کیمی طوفانلی
مین ایل سورسه قالارام، یئنه عشقه نیشانلی
نیگاریم گاسه گورسه، اوره یی اودلو قانلی
یاتار دورماز بو درده، دئییر کی اویانمیرام.
گئدر اولدو نیگاریم ادل ایچیندن غوربته
هئچ بیلمه دی دیغلارام، دوزه بیلمم حسرته
او اولدو ایتگین، سورگون، چاتمادی سعادته
خوشبخت اولسایدی باری، دئییردیم کی یانمیرام.
سولغون کونول قوی یانسین، ایلقاریما اینانسین
بو قارا باسما ایله، قوی یوخودان اویانسین
بیلسین بئله دیر دونیا، بئله لیکه یارانسین
یانان عشقین اودونا دئییر کی یوخ! یانمیرام.
"مسعود" دئییر یار عشقی، بالدیر من اونا آری
دونیا لذتلریله سئوگیدیر یاری – یاری
سئوگی پیلله لریله یوکسه لرسن یوخاری
بو عشقین اول سوزو، دئییه سن، اوسانمیرام.
02/04/1376
اولار آیا من ایچین دیلبر و دیلدلر اولاسان؟
اوره ییم غمخانادیر سن ا.نا غمخوار اولاسان؟
یئنه دیلدلرا دئدیم گل بو اوره کدیر سن ایچین
دائمن تاب و تب ائیلیر سن اونا یار اولاسان.
یارپاغیم سولدو خزان تاپدالاییب وار یوخومو
دئمیرم بیرده گلیب ده سن اونا بار اولاسان.
یانارام شام کیمی صبحه کیمی جان وئره رم
بو یانار عشقه دئییر یاتمیشا بیدار اولاسان.
آغیل اوغروندا چالیشدیم کی اولام عاقل شهر
عشقه هوشیار دئدی: آغیلینان اغیار اولاسان.
اولاسان عاشیق و دیوانه جانان گره یی
هامی میلت دئیینه ازدمی بیزار اولاسان.
مین ایلی آغیل اونوتسان یئنه "مسعود" آز اولار
او برابردی همین عشقیده سن زار اولاسان.
09/12/1376
یاتمامیشام، اویاغام، آی آنا جان، آنا جان.
اولوسوما دایاغام، آی آنا جان، آنا جان.
همت منیم شعاریم، وارلیغیما حیمایت
دونیا بویو وار حسرت، قورتولماسا حماقت
واختی سو باشدان آشدی، تاثیرسیزدیر شیکایت
بو درده من اولوره م، آی آنا جان، آنا جان.
تقدیریمی بیلیره م، آی آنا جان، آنا جان.
بو دردلری بیله نه گره کیر کی آییدا.
ایری یولو گئده رسه گره ک کی تئز قاییدا.
غالیب گله ریک سونوندا آز اولساقدا ساییدا.
بو سوزلری دئیه رم، آی آنا جان، آنا جان.
قیزیل کوینک گییه رم، آی آنا جان، آنا جان.
چوخ دونیادا گزرلر، اوزلرینی بزرلر
حاق سوزونو دئیه نی قاداقلاییب ازرلر
هامی گلیب گئده جک، چولده یئل دک گزرلر.
یاخشی یامان قالاجاق، آی آنا جان، آنا جان.
"مسعود" حاقین آلاجاق، آی آنا جان، آنا جان.
2/4/1376
هر گئجه شمع اودونا دولت پروانه یانار
عشق زوققومون ایچین عاریف فرزانه یانار
دئدیم: ای حور ارم باغی و جنت سنه دیر
دئدی: خلیفه کیسه سیندندی باغیشلا نه یانار؟
دئدیم: ای بوت نه اولار من قول اولام درگاهینا
دئدی: سوس کوفر دئمه، افسونا بوتخانه یانار.
دئدی: ای وای منه اولماسا بیر جام شراب
اوجا سسله دئدی کی: ایستمه پیمانه یانار.
دئدیم: ای سرو گوزه ل قامتینین قوربانیام
دئدی: آیدیندی ائله اولمه لی قوربانه یانار.
دئدیم: آخیر سنین عشقیده یانان "مسعود" اولوب
دئدی: مسعود اولا یا اولمویا، بیر آنه یانار.
21/01/1367
اؤزومو سئودیییم قده ر،
من سنی سئومیشم وطن.
تانری دییه اوندان بتر،
من سنی سئومیشم وطن.
یارپاقلارا، بوداقلارا،
گئتمه رم من اوزاقلارا،
من سنی سئومیشم وطن.
***
کونلوم قوشون اوچوردما دای،
جانیمداسان گل ائتمه زای،
بایراغیندا اولدوزلا آی،
من سنی سئومیشم وطن.
آند ایچیرم بایراغینا،
اوره یینده کی یاغینا،
باش قویارام آیاغینا،
من سنی سئومیشم وطن.
من سنی سئودیییم قدر،
عومروم داها اولماز هدر،
سندن دوغار هم ایگید، ار،
من سنی سئومیشم وطن.
آدیم *هارای* سنه قوربان؛
شرافتیم سندن نیشان؛
وطن منه ـ منه اینان؛
من سنی سئومیشم وطن.
خییاو دوستاغی
بوراسی دوستاقدیر ایگیدلر هاردا؟
دوشوندوم یاواشجا من اؤزلویومو.
اللریم کلبچه گوزلریم باغلی
سیندیردی یالتاقلار جان گؤزلویومو.
گله جک بیر داها وطن اوغروندا
ایگیدلر ال-اله،جان-جانا وئره.
وطنین ناموس تک قورویوب یئنه،
اوغروندا جانینی جانانا وئره.
هایدی بو شرفسیز فارس کوپکلری
هورویور جانیما قانیمی سورسون.
سن یئنه یاتیبسان دویغولاریندا
ایسته ییر اوزگورلوک آیاغین یورسون
بوراسی دوستاقدیر، اؤلوم چیرپینیر
یاشاییر بورادا کونول یاراسی
منده مین دن بیر ار،آزربایجانین
خان چوبانی،سنده آراز ساراسی
***
سئوگیلیم اونوتما وطن بیزیمدیر
اوندا یاشایاجاق اوزگورلوک سؤزو
سن ایله ال-اله یاشاداجاییق
بیر ایشیق باخیشلی ماویلیک گؤزو
اوسانما دئمه کی دوستاقداییق بیز
اوره یی دوستاقدا ،اوزو دوستاقدا
سنین ده اوره یین، منیم ده جانیم
واریکن یارانیب سؤزو دوستاقدا
من وطن دوستاغین وطن بیلیره م
نامردلر الینده یارالانمیشام.
بیر ایشیق باخیشلی،گونش گؤزلویم
یالتاقلار الیله قارالانمیشلام .
اردبیل دوستاغی
وطن دییه یار دئدیم؛
اوْنسوز منه عار دئدیم.
وطن دئدیم،
وار دئدیم.
هارای اوْیار الیندن ؛
اوْ قارا گؤزلریندن.
گولوشومده چیچکدیر
آنامدیر،
آغ بیرچکدیر.
گولومدیر،
چیلچیلکدیر.
هارای اوْ یار الیندن؛
اوْ قارا گؤزلریندن.
آغلایاندا گؤزمدور؛
دیلیم یانار سؤزمدور.
من من اولسام،
اؤزومدور.
هارای اوْ یار الیندن؛
اوْ قارا گؤزلریندن.
من اونا کیم،
دئمه دیم.
قیزیل یا سیم،
دئمه دیم.
سنسن دردیم،
دئمه دیم.
هارای اوْ یار الیندن
اوْ قارا گؤزلریندن
بولبول منم،
گولوم سن.
آغلاما سن،
گولومسن.
بولبولوم سن،
گولوم سن.
هارای اوْ یار الیندن
اوْ قارا گؤزلریندن
گئدر گؤزومدن آغیم؛
سنسیز سولار بوداغیم؛
ساپ سارالار یاناغیم.
هارای اوْ یار الیندن؛
اوْ قارا گؤزلریندن.
وطن آدیم،
سنسن می؟
من سن یادا،
سن من می؟
ایکیمیز بیر،
بدن می؟
هارای اوْ یار الیندن
اوْ قارا گؤزلریندن.