بیر تنقید
سایین مسعود بی جینابلاری
دئدیینیز کیمین بیزی دونیادا تانیمیرلار ها بئله تورکیه جمهوریتینده و بو آجی بیر گئرچک
بو گئرچک اورادا داها آجیلانیر کی بیز اؤزوموزده اؤزوموزو تانیمیریق
ایسته میرم تیکرارلی سؤزلری بورادا گتیرم
آنجاق منجه بیزیم دردیمیز بیر و یولوموز فرقلی دیر
بیلدیینیز کیمی بیزیم پرابلئملریمیز او قدر دیر کی بو قونولاردان سؤزآچماق ساده دوشونجه لیگیمیزدن اولا بیلر
بیر آز دیقتلی اولسانیز گؤررسیز کی اؤز خالقیمیز هله ده او قدر کی گرک بیزی قبول ائتمه ییب ، پان تورکیست آدلاندیریب ، سوچلاییرلار
بو خالق اؤز دیلین اوخوللاردا اوخویوب ، یازمییب اونا گوره ده خالقین دیلی سیزین دیلینیزله چوخ فرقلی دیر
منجه بو دردلرین یوکون داشییان بیزیم آیدین فیکیرلریمیز ها بئله شاعیرلریمیز و یازیچی لاریمیز دیرلار
خالقی اویاتماق ایچین خالقیمیزلا ایلگیلشمه گیمیز گرکلی دیر یوخسا خالق بیزی اؤزوندن بیلمه ییب و بیزه اینانمییاجاق
بیزیم ایلک تکلیفیمیز اؤز خالقیمیزی اویاتماق و اونون دردلرین ، ایستک لرین تانیماق دیر
اونوتمامالییق کی تورکیه تورکجه سینده یازماقلا یا تورک دونیاسینین بیرلیگیندن دانیشماقلا اؤزوموزو تانیددیرا بیلمه ریک
بو پرابلئم یالنیز بیزیم خالقیمیزین بیرلیگی ایله ، گونئی آذربایجانین ایستیقلالیتی و ها بئله خالقیمیزا میلت عنوانی قازانماقلا حل اولونا بیلر
سیز یقین اؤزونوز بو پرابلئملری چوخ آیدین آشکار گؤرورسونوز
باخین تورکیه جومهوریتی بیزیم کیمین بو قدر ساده بو قونویا فیکیرله شمیر . اونوندا تورک دونیاسینین بیرلیگینده اؤزونه عاید منفعت لری وار
اونلارین اورگی بیزلر ایچین یانمییب
دئمه لییم کی حتی قوزئی آذربایجان اؤزونه عایید میللی منفعت لری وار و او منفعت لرین اوغروندا گونئیی ساتیب و ساتاجاق
بو نئچه ایلده قوزئیین خاریجی سیاستلرینه باخسامیز بو سؤزون گئرچک اولدوغون گؤره بیلریک . البت من دئمیرم بیز بین الخالق سیاستلریندن فایدالانمییاق
یوخ . منجه بیزیم سیاستچی لریمیزین ان بؤیوک هونری بو فضالاردان فایدالانماق دیر
بیرده منیم عزیز قارداشیم شاعیرلر ان ایده آلیست اینسانلاردان ساییلمیرلار
بو سؤز چوخ کوهنه دیر . شاعیر ایده آللاردا سئیر ائتسه ائله او ایده آللاردا دا قالاجاق
اونون سؤزونه کیمسه دیر وئرمییه جک . شاعیر گئرچک لری گؤرمه لیدیر
شاعیرین دیلی عوریان بیر دیل اولاراق گؤرونمز گئرچک لری ، پرابلئملری تصویره چکملیدیر
مسعود بی بیر آز درین فیکیرلشسز گؤررسیز کی داها ایده آلیسم دورانی کئچیب . بو زاماندا ایده آللاردان دانیشماق بیر آز گولمه لیدیر
سوندا منده تشککورومو بیلدیریب و سیزه اوغورلار دیله ییرم
درین حورمتله
سارای
----------------------------------------------------------------------------------
بیر آچیقلاما
چتین لیک او زاماندان باشلاییر کی بیزیم میلتین شاعیری، سیاستچی سی و سیاستچی سی شاعیر اولور. و داها چتین بو کی شاعیر سیاستچی و سیاستچی شاعیرده بو گون میدانا گلیب.
بیز بیر میلتین شاعیریق کی او میلت شعیر دیلی یوخ بلکه اوز آنا دیلینیده تانیمیر و بیلمیر. من سیزین نه قدر رئالیست یا سوررئالیست بیر شاعیر اولدوغونوزو اولچومورم. دوشونورم سیز شعیر دیلینده رئال و گاهدان سوررئال بیری سینیز. و بو گئرچکدن سیزین حاقینیز. دئمک شعیر گلنده رئال یا سوررئال سوروشمور .
منیم سیزه یازدیغیم شاعیرلره عاییدیر، یانی شاعیرلر اونلار کی شعیر یازیرلار و یاراتیرلار. دوغروسو بیزیم میللی چتین لیکلریمیز و اونلارا قارشی چوزوم آپاران سیاستچی لریمیز گئرچکلری دریندن دوشونمه لیدیرلر.
من بئله دوشونورم سیز منی بیر شاعیر یولداش کیمی چاغیریب و سونرا بیر سیاست آدامی کیمی تنقید ائدیرسینیز. و گئرچکدن بو ایش یئترسیز. من سیزینله بیر ادبیات آدامی کیمی یازیشدیم. دئمک وبلاگلاریمیزدا گئدن قونو یالنیز بو. بیز بیر شاعیر سیاستچی اولورساق کی بو گئرچکدن چتین، داها یئترلی بو کی سیاستی سیاست ائوینده قوناقلایاق و شعیری شعیر ائوینده. منجه بو ایکی قونونو بیر ائوده قونوشمامالیق.
داها سونرا تورکجه، تورکجه دیر دئییرم. ایسترسه تورکیه تورکجه سی، ایستر آزربایجان و ایستر تبریز ،اورمو، اردبیل، زنگان و ... و بو بیر ادبیات آنلاییشی. آما سیاست عالمینده تورکیه تورکیه دیر و آزربایجان، آزربایجان.
ادبیات عالیملری آراسیندا دوولت سینیرلارینین معناسی یوخ سارای خاتین! آما بیلدیین کیمی ایکی کندین آراسیندا سینیر وار. اکینجک یئرلرینینده سینیرلاری وار.
درین حورمتله : مسعود هارای
سلام هارای قارداش.هارای دان دوشمه هئچ زامان.کامئنت قویدوغونوز خاطیره یادئما گلملیر.وئبلاغینئزئ ایزله ییره م.سیزه اوغورلار.