"جنگی کوراوغلو"
اوزگورلویه ساواشماق دوغرو
دوغراناجاییق داغراماساق بئله
"یانیق کرمی"
یانمیش اورکلریمیزین دمی
توستوسو
"تورپک اوتو"نا معروض بیر زمی
"قاراباغ شیکسته سی"
قارا باغریمیزین قانامیش گوزگو نفسی
"اوزان عاریف "ین سسی
"موسلوم ماقایوف"ون شیکسته سی
ده دم قورقودون ده دسی
"اسماییل لاچین" ین هر نمه نه سی
اؤزومو سئودیییم قده ر،
من سنی سئومیشم وطن.
تانری دییه اوندان بتر،
من سنی سئومیشم وطن.
یارپاقلارا، بوداقلارا،
گئتمه رم من اوزاقلارا،
من سنی سئومیشم وطن.
***
کونلوم قوشون اوچوردما دای،
جانیمداسان گل ائتمه زای،
بایراغیندا اولدوزلا آی،
من سنی سئومیشم وطن.
آند ایچیرم بایراغینا،
اوره یینده کی یاغینا،
باش قویارام آیاغینا،
من سنی سئومیشم وطن.
من سنی سئودیییم قدر،
عومروم داها اولماز هدر،
سندن دوغار هم ایگید، ار،
من سنی سئومیشم وطن.
آدیم *هارای* سنه قوربان؛
شرافتیم سندن نیشان؛
وطن منه ـ منه اینان؛
من سنی سئومیشم وطن.
خییاو دوستاغی
بوراسی دوستاقدیر ایگیدلر هاردا؟
دوشوندوم یاواشجا من اؤزلویومو.
اللریم کلبچه گوزلریم باغلی
سیندیردی یالتاقلار جان گؤزلویومو.
گله جک بیر داها وطن اوغروندا
ایگیدلر ال-اله،جان-جانا وئره.
وطنین ناموس تک قورویوب یئنه،
اوغروندا جانینی جانانا وئره.
هایدی بو شرفسیز فارس کوپکلری
هورویور جانیما قانیمی سورسون.
سن یئنه یاتیبسان دویغولاریندا
ایسته ییر اوزگورلوک آیاغین یورسون
بوراسی دوستاقدیر، اؤلوم چیرپینیر
یاشاییر بورادا کونول یاراسی
منده مین دن بیر ار،آزربایجانین
خان چوبانی،سنده آراز ساراسی
***
سئوگیلیم اونوتما وطن بیزیمدیر
اوندا یاشایاجاق اوزگورلوک سؤزو
سن ایله ال-اله یاشاداجاییق
بیر ایشیق باخیشلی ماویلیک گؤزو
اوسانما دئمه کی دوستاقداییق بیز
اوره یی دوستاقدا ،اوزو دوستاقدا
سنین ده اوره یین، منیم ده جانیم
واریکن یارانیب سؤزو دوستاقدا
من وطن دوستاغین وطن بیلیره م
نامردلر الینده یارالانمیشام.
بیر ایشیق باخیشلی،گونش گؤزلویم
یالتاقلار الیله قارالانمیشلام .
اردبیل دوستاغی
اودون باشیندا اوتورموشدوق
وطن دردینی دوداقلاریمیزدا
اوتقونوردوق
اود کیمی آلیشیردی ایچیمیز
بیز ایکیمیز
هاوا قورقوشوم آغیرلیغیندان آغیر
دومان،
گوزلریمیزه چیسیب دونموشدو
بیر بیرینه چارپیردی دیشلریمیز
بیز ایکیمیز
اوره یی آغیرماسین دئیه
آغلاییردی ایچی
شعیر آلیشدیر ایچیمده دئدی:
شعیر آلیشیردی ایچیمیزده
بیز ایکیمیزده
بذ قالاسینین اته یینده
یورقون آیاقلاریمیزین ایزی
قاناییر ایندیده
بیز ایکیمیزده
یالنیز او گئجه
دونیمیزه دولاشان دونرگه لریده
بیره ر دولاشاردیم سنه– بیره ر
سن اورمو دنیز قیزیسین می
بو قدر شیرینلییی دوداقلار آراسیندا نئدن گیزلی گیزلی چئینه ییرسن به
بالیق کیمی زووزک
لپه کیمی یوموشاق
من آما قورد باخیشلییام به به
قورخمییورموسون سن
دینله ییرسین می منی؟
خییاوانلار اوزانیشیندا
اوزانمیش کؤلگه،
قالدیریملاردا قالان،
آخسار بیر آیاق ایزی
ایندی اونوتدوم سنی قیشقیردی
:من چولاق دئییلیم بلکه
بیر آیاق قابیمی ایتیرمیش یولچویوم.
شاشباش ائتمیشدی اوزونو
یوخسا او من دئیه سنمیشسن.
سنسیز تومورجوقلانمیش آرزیلاریم
بوینو بوکوک
ده ده سیز بیر اوشاق کیمی
سیرتیلاجاق کوچه بازاردا اوزلری
آرا بیر آزاجاقلار تموز گئجه سینده سویوقدان
قیوریلیب پوشلنه جکلر
سنسیز عوصیانا چارپان دیشلریم
قودلاناجاقلار
قورخودان قوخاجاقلار ایچلری
بویور
گئدیرسن اوزاقلارا گئت
"عوصیانکارا الوداع دئمزلر"
سنسیز سالاما ترپنن قولاقلاریم
دولورلار هوی هویا
قوی بو فلاکت یاغمورو آلتیندا
یالنیز من ایسلانیم.
گلیشه جک بیر گون یالنیز
بو شعیرلر
آخشام چاغیندا
ثانییه میلینه اوخشادیرام
او قده ر
تئز دویاجاقسان منی.
ننگ-نهنگ آتدیم آت
سنی قاراجا بالیق کیمی
بالاجا بالیق کیمی
دنیزدن آییرماسینلا
بوْغماسینلار
بوْغدورماسینلار
وار اولدوغونو قورو
بالیق سان بالیق اوْل
دنیزلر اورمانیندا
آسلان کیمی
نهنگ-نهنگ یاشا
نهنگ-نهنگ آتدیم آت.
دینمزدیم بویله
دینمزدیمده
یالنیز هیچقیریقلی باشیمی دووارلارا چالاردیم
بوینومو اپه دارا چکردیم
الیمده اولسایدی دوراردیم آرتیق
قورد اوره ییمی چئینه یردیم دیشیمده
قبیر داشیمی اوز الیمله قازمازدیم بویله
الیمده اولسایدی باش آلیب گئدیردیم بوردان
یادا ادول اوچون فارسجا یازاردیم آنجاق
اولمادی الیمده آرتیق
بو اوره ییم سنین دوستوم
گوتور الی قولوباغلی آپار بونو
آیاقلارینی کس
دوداقلارینی تیک
دیلینی باغلا
نئدن یئنه ده دانیشاجاق دردینی
ایسترسن ده آیاقسیزلیقیلا لزگی اوینایار سنه
یاخود اولایاجاق بیر بوز قورد کیمی.
بیر تورکودور گؤزلرین؛
اوخویار جانیمی.
دوداقلارینین ترپه نیشی،
چیرپیندیرار اوره ییمی.
گؤزلرینی یومسانا
دوداقلارینی…
من اؤلوم دایان،
قوی دویونجا گوروم سنی.
بیر گون سنینده بئلین بورکولجک،
چه لیک اوتموشلار کیمی.
الینی بئلینه چاتیب،
زیققینا – زیققینا
زیققیدییا – زیققیلدییا گئده جکسن.
بومبالار آخشامیندا پارتلایاجاق اوره یین.
پیچاقلار آغزیندا سسله نجه ک آدین.
*مانتاجسیز تایر* اولاجاقسان ائله بیل.
**از ارائه خدمات به افراد بدحجاب معذوریم.**
باش اورتولو، یاشماق آغیز،
سنه آراباسین کیمسه ساخلاماز اولاجاقسان.
دولاجاقسان قوولوق کیمی یئله.
ائله بئله،
شیشجک قارنین آجیندان.
چیخاجاق توققاناغین.
قول قانادین دوشه جکدیر یانینا.
دئی اونا دئی بونا،
کیم دوشونه، کیمدی قانا؟!
باشی داش، گؤزو یاش
هارانین کولون الیییم دئیه جکسن باشیما.
زیرنا قاوال چالیناجاق.
اویناماغین توکوله جک قاب قاشیغا؛
ایچمه میشدن دئیه جکلر کئفله نیبدیر.
قوهوم قارداش یاد اولاجاق.
سندن بلکه بیر میثقال جا آد اولاجاق؟
بونو بیل کی،اوندا منده
سنی هئچ واخت سئومه میشم دئیه جیم.
گوی نه گونه قالمیشام کی
بودا به ینمیری منی.
:دئیه جکسن.
هه ییف اولسون سنه،
عسگر اؤلدو.
:دییه جه یم.
آتلار هورکودو
دنیزلر سوسدو
قارتاللا یووالاندی
آنجاق
بیر کیمسه دینمه دی
دینه نمدی…
آتلارا میندیلر
سوردولر
سوروندوردولر
آرازدا بوغدولار
دایازدا بوغدوردولار
و بیر کیمسه دینمه دی
دینه نمه دی
دوستوم!
ایندیسه قوردلار
ایته اوخشایان،
خورناز پیشیکلر کیمی دیرلر.
آرادیم- آرادیم.
آختاردیم- آختاردیم.
تاپدیم؛
تاپدیم دئدیم:
شوبــــــــــــــــــــــــــــه.
بورادا قار یاغیر
چیسگین لیک قوجاغیندا آغاجلار
به به لر کیمی
اوشویور اللری
ایستکلری بوز بولاغی
و من
اوجسوز بوجاقسیز دیله مه لرین سونو
شعیر اولاجاق بیر گون
بو دورد دووار آراسینداکی ایستی دن
سویوقدا کیریمیش اللریم.